Ólafur: Jón þarf að leggja mikið á sig til að verða betri en ég

Ólafur F. Magnússon, fráfarandi borgarfulltrúi og fyrrverandi borgarstjóri, segist ætla gefa meirihluta Besta flokksins og Samfylkingarinnar tíma til að sanna sig. Hann segir að Jón Gnarr þurfi að leggja mikið á sig til að verða betri borgarstjóri en hann hafi verið.

Nýr meirihluti Samfylkingar og Besta flokksins í Reykjavík var kynntur í gær. Sóley Tómasdóttir, oddviti VG, sagðist í samtali við fréttastofu í gærkvöldi vera afar spennt að sjá fyrir hvað meirihlutinn standi fyrir. Á blaðamannafundinum í gær hafi einungis verið greint frá því hvaða embættum Jón og Dagur koma til með að gegna. Ekki hefur náðst í Hönnu Birnu Kristjánsdóttur, fráfarandi borgarstjóra og oddvita sjálfstæðismanna.

Ólafur náði ekki kjöri í kosningunum um síðustu helgi en hann var fyrst kjörinn í borgarstjórn árið 1990. Hann gegndi embætti borgarstjóra frá janúar til ágúst 2008.

„Ég sagði eftir að fyrstu tölur lágu fyrir að þeim Jóni Gnarr og Degi B. Eggertssyni bæri lýðræðisleg skylda til að mynda meirihluta og taka forystu í borginni. Í umræðum um kvöldið reyndi Hanna Birna Kristjánsdóttir í allra sinni valdagræðgi að véla sig inn til embættis og að kjötkötlunum á ný. Meirihluti framsóknar- og sjálfstæðismanna kolféll og því er eðlilegt að minnihlutinn og nýi flokkurinn taki við," segir Ólafur.

„Eigi bakka!"

Spurður um tilvonandi borgarstjóra segir Ólafur: „Jón þarf að standa sig mjög vel ef hann ætlar að verða besti borgarstjórinn á undanförnum árum því fram að þessu er það undirritaður."

Ólafur segir að það sé ekki sitt að setjast í ráðgjafasæti. „Ég hef hef mín prinsipp og mínar aðferðir. Ef menn ætla að vera lengi í pólitík, láta gott af sér leið og ekki smitast af sníkjueðli stjórnmálanna þá bið ég Jón um að minnast orða minna sem hafa verið mitt leiðarljós í pólitík: Eigi bakka!"