Ánægð með tilmæli talsmanns neytenda

Hagsmunasamtök heimilanna lýsa yfir ánægju með tilmæli talsmanns neytenda til fjármálafyrirtækja um að lægri föst krónutala verði innheimt til bráðabirgða af lánum sem vafi leikur á hvort falli undir fordæmisáhrif nýlegra gengisdóma Hæstaréttar.

Í tilkynningu sem Hagsmunasamtökin sendu frá sér í gærkvöldi segjast þau telja að í tilmælum talsmanns neytenda séu neytendur látnir njóta vafans um útkomu í fordæmisgefandi dómsmálum sem síðar muni falla dómar í. Sú aðferð sem lögð sé til í tilmælunum, einfaldi allan útreikning greiðslna og komi því um leið í veg fyrir ágreining lántaka og lánveitenda um þessa útreikninga. Hvetja þau öll fjármálafyrirtæki til að fallast á þessi tilmæli talsmanns neytenda.