Strætó gæti sparað milljónir í vistakstri

Strætó bs. gæti sparað um 65 milljónir árlega með því að vistaka vögnum sínum, en fyrirtækið hefur ekki áhuga á hagræðingu. Þetta segir Þórólfur Gunnarsson framkvæmdastjóri Saga System, fyrirtækis sem sérhæfir sig í vistakstri.

Blaðið greindi frá því á dögunum að Saga hefði selt flotastýringarkerfi sitt til Tide Buss, norsks rútufyrirtækis með um 1.300 bíla. Þegar Þórólfur er spurður um rekstur Strætós rifjar hann upp að 2003 hafi Saga sett vistaksturskerfi í vagna fyrirtækisins. En bílstjórarnir hafi fengið að setja eigin viðmið um hvað væri vistakstur.

„Strætó setti kerfið þannig upp að nánast engin leið var að fara út yfir góðakstursmarkmið,“ segir Þórólfur. Strætó hafi því í fjögur ár, allt til 2007, borgað fyrir kerfi sem ekki var notað í raun.

„Strætó er alveg útópískt fyrirtæki því þar eru svo mörg tækifæri til hagræðingar. En þetta er eina fyrirtækið sem okkur hefur mistekist að innleiða kerfið í,“ segir hann.

Reynir Jónsson, framkvæmdastjóri Strætós segir að vistaksturs­kerfi Þórólfs hafi verið eitt af mörgum gæluverkefnum Strætós þegar Reynir hóf þar störf. Það hafi verið dýrt og ekki hentað fyrirtækinu.

„Við kennum mönnum að aka eins vel og hægt er. Fyrirtæki getur verið með heimsins besta kerfi, en ef enginn kann á það þá nýtist það ekki. Hér hefur vantað þekkingu og við mátum það svo að við hefðum ekki bolmagn til að nota kerfið,“ segir hann. Aðrar leiðir hafi verið farnar í staðinn og einblínt á þjónustu fremur en aksturslag.

Reynir svarar því ekki játandi spurður hvort vagnstjórar Strætós aki samkvæmt vistakstursviðmiðum. Starfsmenn séu þó sendir á slík námskeið. Meðalhraði Strætós sé lágur, þótt ekki sé allt fengið með því að keyra hægt.

Spurður hvort rétt sé að ekki hafi verið farið eftir viðmiðum Saga eða viðvörunum hlýtt þegar kerfið var notað, segir hann að Þórólfur hafi einu sinni rætt þetta við sig: „Af hverju gripu þeir ekki alvarlega inn í, fyrst þeir vissu þetta?“ spyr Reynir. Um það að fyrirtækið hafi ekki áhuga á hagræðingu minnir hann á góðan tekjuafgang á síðasta ári.

klemens@frettabladid.is