Segja hvorki affallsvatn né gufu hafa áhrif á grunnvatnið

Orkuveita Reykjavíkur segir að hvorki affallsvatn frá Hellisheiðarvirkjun, né gufa frá virkjuninni, geti haft áhrif á grunnvatn í Ölfusi.

Ábúendur á Friðarstöðum, skammt frá Hveragerði misstu kýr af ókunnum ástæðum. Þeirra eigin rannsóknir sýna að kýrnar virðist hafa orðið fyrir arsenikeitrun. Þeir telja að arsenikmengun eigi rót sína að rekja til virkjana Orkuveitu Reykjavíkur.

Fram kom í fréttum stöðvar tvö að mælingar á neysluvatni á friðarstöðum og í Hveragerði sýna að magn arsenikks er langt undir viðmiðunarmörkum.

Orkuveita Reykjavíkur, hefur í kjölfar þessara frétta sent Heilbrigðiseftirliti Suðurlands greinargerð um hugsanlega mengun frá virkjunum. Þar segir að affallsvatn frá Hellisheiðarvirkjun, en þar er styrkur arsenikks allhár, hafi ekki áhrif á grunnvatn í Ölfusi. Enn fremur hafi gufa frá virkjuninni heldur ekki áhrif á grunnvatn. Bent er á mosarannsóknir sem sýni að í 700 metra fjarlægð frá jarðvarmavirkjunum sé ekki marktækur munur á styrk arseniks og á svæði þar sem efnið er í náttúrulegum styrk.