A og B vinna saman í Ölfusi

A listi Fyrir okkur öll og B listi Framfarasinnar hafa gengið frá málefnasamningi um að starfa saman í meirihluta í Sveitarfélaginu Ölfusi kjörtímabilið 2010-2014.

Þetta kemur fram í tilkynningu sem flokkarnir hafa sent frá sér. Þar segir einnig að forseti bæjarstjórnar verður Sigríður Lára Ásbergsdóttir af A lista og formaður bæjarráðs verður Sveinn Steinarsson af B lista. Auglýst verður eftir bæjarstjóra fljótlega.

Meðal markmiða meirihlutasamstarfs A Fyrir okkur öll og B Framfarasinna er að auka aðkomu annarra lista að undirbúningi mála og ákvarðanatöku þannig að bæjarstjórn og nefndir vinni í meira mæli sem ein heild í þágu allra bæjarbúa.