Lóðin fyrir PrimaCare til reiðu

Samningar um lóð í Sólvallalandi í Mosfellsbæ fyrir einkasjúkrahús og hótel PrimaCare ehf. verða undirritaðir á næstu vikum, að sögn Gunnars Ármannssonar, framkvæmdastjóra félagsins.

„Þetta stendur mjög vel og er allt á fleygiferð,“ segir Gunnar sem kveður PrimaCare nú hafa fengið fyrri hluta af skýrslu sem Deloitte í New York gerði um rekstrargrundvöll einkasjúkrahússins. „Þarna eru mjög jákvæðar niðurstöður.“

Að sögn Gunnars hafa nokkrir fjárfestar hér innanlands komið að verkefninu. Nú verði hins vegar horft til erlendra fjárfesta. Margir þeirra hafi þegar sýnt verkefninu áhuga, sumir að eigin frumkvæði. Búast megi við því að erlendir aðilar verði meirihlutaeigendur í sjúkrahúsinu.

„Það verður ekki bæði haldið og sleppt. Ef við viljum fá erlenda fjárfestingu inn í landið þá verðum við líka að þola það að þeir sem festa sitt fé á Íslandi vilji fá arð af sínu fé og að hann muni renna úr landinu að einhverju leyti. En eftir stendur að uppbyggingin og öll atvinnusköpun verður hér á landi. Og það er kannski það sem skiptir mestu máli,“ segir Gunnar sem kveður risafyrirtækið Skanska hafa samþykkt að vera aðalverktaki í framkvæmdunum.

Gunnar segir áætlað að hefja rekstur sjúkrahússins á fyrsta fjórðungi ársins 2013. Það mun sérhæfa sig í hnjá- og mjaðmaliðsaðgerðum fyrir útlenda sjúklinga, einkum frá Bandaríkjunum en einnig frá Evrópu. - gar