Dr. Gunni verður ekki formaður strætó

Gunnar Lárus Hjálmarsson, betur þekktur sem Dr. Gunni, mun ekki verða formaður Strætó BS. eins og kom fram eftir að nýr meirihluti tók við í Reykjavík 15. júní síðastliðinn. Ástæðan er sú að hann er varaborgarfulltrúi og má því ekki taka starfið að sér. Aðeins borgarfulltrúar mega gegna starfinu. Þetta segir Dr. Gunni á heimasíðu sinni.

Þar segir hann meðal annars að Einar Örn Benediktsson muni líklegast taka starfið að sér.

„Ég verð ekki formaður strætó, enda bara varaborgarfulltrúi. Aðeins AÐALborgarfulltrúar mega taka þetta djobb að sér skv. nokkurra ára gömlum lagabreytingum. Einar Örn tekur því djobbið líklegast að sér," segir Dr. Gunni.