Grætur sig í svefn á hverri nóttu

„Ég er að verða matarlaus. Ég veit ekki hvernig ég á að gefa börnunum mínum að borða" segir grátklökk einstæð tveggja barna móðir á þrítugsaldri. Hún gagnrýnir að hún þurfi nú að framvísa launaseðlum og reikningum til að geta fengið mataraðstoð hjá Hjálparstarfi kirkjunnar.

„Nógu þung eru skrefin samt, þótt ég þurfi ekki að taka með mér heimilsbókhaldið. Hvað veit ég hvað verður um þessar upplýsingar. Get ég treyst því að þetta verði aldrei opinbert?" spyr konan, sem ekki vill láta nafns síns getið. Ákvörðun Hjálparstarfsins að biðja fólk sem þiggur mataraðstoð að skila yfirliti um tekjur og útgjöld hefur verið kærð til Persónuverndar.

„Ég græt mig í svefn á hverri nóttu, því ég á ekki fyrir mat. Ég er búin að missa húsnæðið og bílinn. Ég er á svörtum lista, fæ enga hjálp í bankanum og ég get hreinlega ekki gert neitt," segir konan. Hún segist hafa fengið 10 þúsund krónur hjá Hvítasunnukirkjunni til að kaupa í matinn. Hún býr í sveitarfélaginu Árborg, en segist ekki hafa áunnið sér fullan rétt til bóta, eins og sérstakra húsaleigubóta, í sveitarfélaginu, því til þess þurfi hún að hafa búið þar í ár.

Konan segist vera 75% öryrki. Hún fær um það bil 157  þúsund krónur eftir skatt á mánuði. Þar af fari 117 þúsund í húsaleigu. Hún eigi 40 þúsund eftir fyrir öllu öðru. „Ég get ekki keypt skó, eða stígvél eða regnföt handa börnunum, ekki neitt," segir konan, en börnin hennar eru 7 og 9 ára. Hún hafi reynt að komast í ódýrara húsnæði, en ekki haft erindi sem erfiði.

Fram kom í fréttum Stöðvar 2, snemma í mánuðinum að við fyrstu matarúthlutun hjálparstofnana hafi myndast langar raðir. Það sé óvenjulegt svo snemma í mánuði. Þær reyni að bregðast við með því að forgangsraða skjólstæðingum sínum eftir því hvar þörfin sé mest.