Bónuskerfi bankastarfsmanna verði skattlagt upp í rjáfur

Róbert Marshall, þingmaður Samfylkingarinnar, ætlar að berjast gegn því að bónuskerfi verði tekin upp í bönkunum. Hann segir eðlilegt að slíkt kerfi verði skattlagt upp í rjáfur. Þetta kom fram í máli þingmannsins við upphaf þingfundar í dag.

Fréttablaðið greindi frá því gær að þreifingar væru um að taka aftur upp bónuskerfi í Arion banka, Íslandsbanka og Landsbanka

líkt og var við lýði fyrir hrunið haustið 2008. Hugmyndir í þessa veru ógna uppbyggingu íslensks efnahagslífs, að mati Róberts. Hann sagði kerfið hafa hvatt til skammatímalánatöku sem hafi verið ein helsta ástæða þess að bankarnir hrundu. Róbert sagðist ekki vilja að partíinu frá 2007 yrði haldið áfram.