Innflytjendur almennt með jákvæða upplifun af Íslandsdvöl

Innflytjendur á Íslandi virðast almennt hafa jákvæða upplifun af því að búa hér á landi þrátt fyrir sumir þeirra hafi upplifað ákveðna erfiðleika við komuna til landsins. Margir þeirra telja sig þó hafa orðið varir við aukna fordóma í þeirra garð á síðastliðnum árum. Þetta kemur fram í skýrslu sem byggir á viðtalsrannsókn sem Rannsóknamiðstöð Háskólans á Bifröst stóð fyrir á sumar og haustmánuðum 2009.

Í rannsókninni voru tekin viðtöl við innflytjendur og fulltrúa sveitarfélaga og annarra stofnanna sem koma að starfi með innflytjendum í þremur sveitarfélögum, á Akranesi, í Fjarðabyggð og í Vesturbyggð. Markmið rannsóknarinnar var að kanna hvort og þá hvernig félagsleg þátttaka innflytjenda tengist því hversu sterkt þeir upplifa sig sem hluta af samfélaginu og hvernig þeim hefur gengið að aðlagast á Íslandi. Jafnframt var markmið að greina aðkomu sveitarfélaga og annarra stofnanna að málefnum innflytjenda í hverju sveitarfélagi fyrir sig.

Viðmót heimamanna almennt jákvætt

„Helstu niðurstöður úr viðtölum við innflytjendur voru þær að almennt höfðu þeir jákvæða upplifun af því að búa á Íslandi þrátt fyrir að hafa upplifað ákveðna erfiðleika við komuna til landsins. Flest töluðu um að viðmót heimamanna sem fyrir voru hafi almennt verið jákvætt en minntust jafnframt á að þau höfðu orðið vör við fordóma í sinn garð sem hafi jafnvel orðið meira áberandi á síðastliðnum árum. Margir töluðu um að hafa komið til Íslands með það markmið að vinna í nokkur ár og flytja svo af landi brott, en tóku svo ákvörðun síðar meir að setjast að á Íslandi. Ástæður fyrir því voru helst að hér höfðu þau byggt upp sitt líf, keypt sér húsnæði og að samfélagið byði upp á góða og örugga framtíð fyrir börnin þeirra. Allir þeir sem talað var við og höfðu tekið ákvörðun um að setjast að á Íslandi töluðu um mikilvægi þess að geta talað íslensku, bæði til að geta orðið virkari þátttakendur í samfélaginu og vegna þess sjálfstæðis sem því fylgir að geta talað tungumálið," segir í tilkynningu frá Rannsóknamiðstöð Háskólans á Bifröst.

Nánar má kynna sér efni skýrslunnar hér.