Átta prósenta samdráttur milli ára

Alls flugu 101.504 flugvélar um íslenska flugstjórnarsvæðið á síðasta ári, að því er fram kemur í tilkynningu Flugstoða. Mun það vera í þriðja sinn á jafnmörgum árum sem fjöldi véla fer yfir 100 þúsunda markið.

„Ef miðað er við árið 2008 þá dróst flugumferð saman um 8 prósent en þá fóru 110.366 flugvélar um íslenska flugstjórnarsvæðið og höfðu aldrei orðið fleiri," segir í tilkynningunni.

Í fyrra var rétt tæpur fjórðungur flugumferðarinnar, eða 24,4 prósent, vélar í flugi til og frá Íslandi. Árið 2008 var hlutfallið 27,8 prósent. „Að meðaltali komu 278 flugvélar á dag inn á svæðið."

Á síðasta ári er flugumferðin sögð hafa verið mest í ágúst eða tæplega 12 þúsund flugvélar.

„Eins og búast mátti við voru flugvélar Icelandair tíðustu gestirnir inni á svæðinu, sem er 5,4 milljónir ferkílómetra að stærð. Því næst komu í réttri röð þýska félagið Lufthansa, British Airways, United Airlines og Delta Airlines."

Flugstoðir segja oftast hafa verið flogið inn á flugstjórnarsvæðið vegna flugleiðarinnar á milli Lundúna og Los Angeles. Í öðru sæti var svo flugleiðin milli Lundúna og San Francisco og svo í þriðja sæti milli Kaupmannahafnar og Keflavíkur. - óká