Mótmælendur boðaðir til Brussel

Búist er við að þúsundir manna víðsvegar að úr Evrópusambandinu mæti til Brussel í dag til þess að mótmæla niðurskurðaráformum ríkisstjórna landa sinna. Talsmenn evrópskra verkalýðsfélaga segja að mótmælin gætu orðið þau stærstu í borginni í áraraðir enda niðurskurðarhnífurinn víða á lofti um álfuna. Á Spáni er allsherjarverkfall hafið vegna aðgerða ríkistjórnarinnar en í flestum löndum sambandsins hafa laun verið lækkuð, lífeyrir skertur og störfum fækkað.

Á Grikklandi og á Írlandi hefur atvinnuleysi ekki mælst meira í áratug og á Spáni hefur atvinnuleysið tvöfaldast á aðeins þremur árum. Ný ríkisstjórn Bretlands hyggst skera niður útgjöld ríkissjóðs um 25 prósent og í Frakklandi hafa mótmæli verið tíð undanfarna daga í vegna áforma þarlendra stjórnvalda um að hækka eftirlaunaaldurinn úr 60 árum í 62.

Skipuleggjendur mótmælanna í Brussel í dag vonast til að allt að 100 þúsund manns mæti á svæðið. Verkalýðsfélögin gagnrýna að niðurskurðarleiðin skuli farinn í svo miklum mæli og krefjast þess að starfsöryggi verði tryggt, velferðarkerfið eflt og eftirlaun hækkuð.