Enginn afsláttur gefinn á öryggi sjúklinga

Það er algjörlega ljóst að þjónustustig hefur minnkað á spítalanum enda átti enginn von á öðru í þeim mikla niðurskurði sem verið hefur síðustu árin, segir Björn Zoëga, forstjóri Landspítala Íslands, í föstudagspistli sínum.

„Við munum eftir sem áður tryggja öryggi sjúklinga og það verður ekki gefinn neinn afsláttur á því," segir Björn. Hann segir að spítalinn muni reyna að veita sem mesta þjónustu til sjúklinga fyrir það fé sem honum verði úthlutað en að ná markmiðum næstu fjárlaga verði bæði erfitt og krefjandi verkefni.

Björn ætlar að koma með nokkrar hugmyndir um úrræði á næstu vikum og kynna þau fyrir starfsmönnum áður en frekari ákvarðanir verða teknar.