Segja aðstæður kvenna í fangelsum mun verri en karla

Aðstæður kvenfanga hér á landi eru mun lakari en karlfanga, að því er Kvenréttindafélag Íslands og Vernd - fangahjálp telja. Í sameiginlegri ályktun frá þeim segja þau að fyrir það fyrsta sé einungis eitt fangelsi í boði fyrir kvenfanga, Kvennafangelsið í Kópavogi, þar sem þrengsli séu mikil.

„Kvenfangar eiga ekki kost á vistun í opnu fangelsi líkt og karlfangar og möguleikar kvenna til framhalds- og starfsnáms á meðan betrunarvist þeirra stendur, eru mun lakari en karlanna. Auk þess gefast kvenföngum ekki sömu tækifæri til að stunda vinnu samhliða afplánun og karlföngum," segir í ályktuninni.