Barnaheill tengist ekki golfmóti Hermanns

Barnaheill - Save the Children á Íslandi segir að félagið standi ekki að fjársöfnun í tengslum við golfmót Hermanns Hreiðarssonar, Herminator, sem fer fram í Vestmannaeyjum á morgun. Í tilkynningu sem félagasamtökin hafa sent fjölmiðlum segir að um sé að ræða misskilning þar sem styrktarsjóður fyrir börn í Vestmannaeyjum er kynntur undir nafninu Barnaheill í Vestmannaeyjum.

„Barnaheill - Save the Children á Íslandi hafa verið þekkt undir þessu nafni hér á landi í rúm 20 ár, þau eru skráð undir því sem félagasamtök og því er þessi misskilningur afar bagalegur.

Í ljósi þeirra fyrirspurna sem borist hafa, siðareglna sem samtökin starfa eftir og af virðingu við þá fjölmörgu styrktaraðila sem lagt hafa Barnaheillum - Save the Children á Íslandi í gegnum tíðina, er ekki annað hægt en ítreka að þessi söfnun Herminator tengist ekki samtökunum og mun ekki renna til verkefna þeirra," segir í tilkynningunni.

Þá óska félagasamtökin, Barnaheill - Save the Children á Íslandi, Hermanni Hreiðarssyni alls góðs sem og styrktarstjóði fyrir börn í Vestmannaeyjum.