Bannað að heita Santa María

„Átján mánuðum eftir að við opnuðum fengum við harðort bréf frá íslenskum hæstaréttarlögmanni, sem segir okkur að til að forðast aðgerðir frá umbjóðanda þeirra sem er risafyrirtæki sem selur krukkusósur og tex-mex-dótarí í stórmörkuðum, verðum við að hætta allri notkun á nafninu Santa María," segir María Hjálmtýsdóttir, annar eigenda matsölustaðarins Santa María á Laugavegi.

„Þeir halda því fram að val okkar á nafni sé tilraun til að gerast sníkjudýr á viðskiptavild þeirra. Það er náttúrlega algjört bull. Við höfum engan áhuga á að kenna okkur við krukkumat. Við höfum alltaf gefið okkur út fyrir að selja alvöru mexíkóskan mat sem á ekkert skylt við það sem kallast tex-mex og stendur svo rækilega merkt á öllum vörum frá þeim."

María segir Santa María-nafnið dæmigert og geti varla talist frumlegt.

„Við bentum góðfúslega á að um allan heim væri hellingur af fyrirtækjum og aðilum sem nota nafnið Santa María og þeir gætu líklega komist í enn feitari bita ef þeir tékkuðu á santamaria.com, santamaria.org, santamaria.de, santamaria.es, santamaria.it og svo framvegis. Listinn er endalaus."

María segir aðfinnslurnar koma beint frá höfuðstöðvum keðjunnar. „Í síðustu viku kom fulltrúi Santa Maria á Norðurlöndum í heimsókn og var hinn kátasti. Hann kannaðist ekkert við málið og sagði þvert á móti að hann myndi vilja útvega okkur vörur frá fyrirtækinu til að auglýsa þær hjá okkur."

Matsölustaðurinn hefur komið til móts við keðjuna. Búið er að taka nafnið úr gluggum og af matseðlum síðan deilurnar hófust. Einnig er búið að taka allt út af léninu www.santa-maria.is.

„Þennan samstarfsvilja þakkar keðjan okkur í gegnum lögmannsstofuna, en heimtar svo að til þess að málinu ljúki af þeirra hálfu þá framseljum við þeim lénið og látum afskrá leyfið okkar fyrir nafninu hjá Einkaleyfastofu," segir María og viðurkennir að vera orðin dálítið pirruð á yfirganginum. „Við erum bara litlir gaurar við Laugaveginn sem höfum ekkert efni á að fara í hart við svona flottræfils risafyrirtæki í Evrópu sem beitir fyrir sig uppskrúfuðum hæstaréttarlögmönnum sem varla glittir í mennsku hliðina á. Ég bara veit ekki hvað gerist næst. Hvort við skiptum um nafn eða hvað."

Valborg Kjartansdóttir hjá lögfræðiskrifstofunni Sigurjónsson og Thor ehf., sem fer með málið fyrir alþjóðlegu matvælakeðjuna, tjáir sig ekki um það við fjölmiðla.

drgunni@frettabladid.is