Þrumuveður á Suðurnesjum - eldingaveður truflar símkerfi

Mikið eldingaveður gekk yfir Suðurnesin nú síðdegis með háværum drunum og miklum ljósagangi samkvæmt fréttavef vf.is.

Að sögn veðurfræðings hjá Veðurstofu Íslands myndaðist eldingaveðrið í kjölfar kuldaskila sem gengu yfir landið í nótt.

Óstöðugt loft fylgdi á eftir þeim með þéttum skúragörðum. Dynjandi haglél fylgdi á eftir skilunum.

Kvikmyndatökumaður Víkurfrétta, Hilmar Bragi Bárðarson náði mögnuðu myndbandi af gjörningaveðrinu og má sjá það hér.

Þá hafa orðið truflanir á símkerfum á Suðurnesjum vegna eldingaveðurs en veðrið hefur áhrif á örbylgjusambönd á vegum Mílu samkvæmt tilkynningu frá fyrirtækinu.

Ekki er vitað hversu víðtækar truflanirnar eru. Greining á því stendur yfir.