Sumir svara: Ég ætla ekki að gera neitt

„Við frestum uppboðum ef fólk gerir eitthvað í sínum málum,“ segir Ásta H. Braga­dóttir, framkvæmdastjóri Íbúðalánasjóðs.

Ekki liggja fyrir haldgóðar upplýsingar um hve margar nauðungar­sölur eru áformaðar í október. Jóhanna Sigurðardóttir forsætisráðherra sagði á Alþingi á miðvikudag að líklega væri um 230 til 240 íbúðir að ræða sem að óbreyttu færu í lokasölu í mánuðinum. Mjög oft væru uppboðsbeiðnir afturkallaðar á síðustu stundu. „Í vinnslu eru leiðir til að forða uppboðum sem fyrir dyrum standa á lögheimilum einstaklinga sem eru að vinna að lausn sinna mála,“ sagði Jóhanna.

Að sögn Ástu frestar Íbúðalánasjóður uppboðum hjá fólki sem óskað hefur frests hjá sýslumanni. „Þegar kemur að uppboði höfum við samband við fólk og skoðum stöðuna.“ Sé fólk að gera eitthvað í sínum málum sé uppboði frestað. Sú sé hins vegar ekki alltaf raunin. „Sumir svara: Ég ætla ekki að gera neitt,“ segir Ásta. Í slíkum tilvikum fari íbúðir, eðli málsins samkvæmt, á uppboð. - bþs