Tunnumótmæli að hefjast við Stjórnarráðshúsið

Boðað hefur verið til mótmæla við Stjórnarráðshúsið milli klukkan tíu og tólf undir yfirskriftinni: Tunnum ríkisstjórnina.

Nokkur fjöldi mótmælenda svaf úti við Stjórnarráðshúsið í nótt til að vekja athygli á bágri stöðu fjölda fólks.

Ríkisstjórnarfundur hófst í húsinu klukkan hálf níu og stendur enn yfir.

„Það er greinilegt að tunnurnar valda titringi þó alvöru viðbrögð láti á sér standa. Aðfararnótt þriðjudagsins ætla hetjulegustu mótmælendurnir að sofa úti við Stjórnarráðið og freista þess að vekja athygli á þeirri nöturlegu framtíð sem stjórnvöld stefna meginþorra íslensku þjóðarinnar í," segir í tilkynningu frá skipuleggjendum mótmælanna.

Þeir hafa hvatt vinnuveitendur til að gefa fólki frí fyrir hádegi í dag þannig að fólk geti tekið þátt í mótmælunum.

„Við viljum ekki aðeins skipta út spilltum stjórnmálamönnum fyrir nýtt fólk sem tekur kjör almennings fram yfir örlög steinhússins við Austurvöl...l heldur viljum við fólk sem sýnir það í verki.

Við höfum ekki efni á að taka við fleiri loforðum frá stjórnmálamönnum sem hafa látið Alþjóðagjaldeyrissjóðinn binda hendur sínar. Þess vegna ríður á að við stöndum saman og trommum kröfum okkar um heiðarlegt uppgjör, mannsæmandi kjör og framtíð landsins inn í Stjórnarráðið," segir í tilkynningu.