Starfsstúlkan fékk áfallahjálp

„Það stökk hérna inn ungur maður og ógnaði starfsstúlkunni með hníf og vildi peningana sem hann og fékk," segir Guðmundur Arnfjörð, eigandi Pizzunar í Núpalind í Kópavogi.

Vopnað rán var framið á staðnum í kvöld og hafði þjófurinn um tuttugu þúsund krónur upp úr krafsinu. Að sögn Guðmundar var starfsmanninum að vonum brugðið en hann fékk áfallahjálp.

„Maður fer að hugsa margt til að fyrirbyggja þetta," segir Guðmundur. Myndavélakerfi er á staðnum og vonast Guðmundur að það verði til að hjálpa lögreglunni við að leysa málið.