Grunnur lagður að sameiningu fjögurra ríkisháskóla

Svo getur farið að innan nokkurra ára verði fjórir ríkisháskólar sameinaðir í einn. Katrín Jakobsdóttir, mennta- og menningarmálaráðherra, hefur sett á fót samstarfsnet skólanna, „með hugsanlega sameiningu í huga", eins og segir í greinargerð fjárlagafrumvarps næsta árs.

Skólarnir sem um ræðir eru Háskóli Íslands, Háskólinn á Akureyri, Landbúnaðarháskóli Íslands og Hólaskóli - Háskólinn á Hólum.

Til viðbótar þessum eru starfræktir þrír háskólar í landinu. Eignar- og rekstrarform þeirra er með öðrum hætti en ríkisskólanna en samt sem áður njóta þeir talsverðra framlaga úr ríkis­sjóði.

Háskólanetinu er ætlað að bjóða upp á fjölbreytt háskólanám á öllum helstu fræðasviðum. Skipulag náms og rannsókna á að miðast við að háskólarnir vinni náið saman og njóti krafta allra núverandi skóla sem starfi áfram undir eigin nafni. Gert er ráð fyrir að nemendur hafi aukin tækifæri til samsetningar náms með því að sækja námskeið í fleiri en einum skóla. Nota á fjarkennslu í auknum mæli til að bjóða upp á fjölbreytt nám víða á landinu með samstarfi við þekkingarsetur og símenntunarmiðstöðvar.

Verja á samtals 300 milljónum króna til starfsemi samstarfsnetsins á næsta og þar næsta ári, að því er fram kemur í fjárlagafrumvarpinu. Þar segir einnig að samdráttur í framlögum til opinberu háskólanna verði heldur minni en til þeirra háskóla sem eru reknir af öðrum og hafa einnig umtalsverðar tekjur af skólagjöldum.

Samhliða stofnun samstarfsnetsins á að breyta lögum um opinbera háskóla svo að þeir starfi allir samkvæmt sömu lögum. Þá á að skipuleggja stjórnsýslu og stoðþjónustu skólanna sem eina heild þótt starfsmenn verði staðsettir víða. Hluti af viðfangsefnum sameigin­legrar stjórnsýslu verður skipulag kennslu og rannsókna og verkaskipting skólanna.

bjorn@frettabladid.is