Skaut krókódíl með skammbyssu

„Það þurfti bara eitt skot við brosið í munnvikinu,“ segir Páll Reynisson, eigandi Veiðisafnsins á Stokkseyri. Hann fór til Suður-Afríku í nóvember þar sem hann veiddi í fyrsta sinn krókódíl með skambyssu. Auk þess sem hann felldi hann strút með skambyssu og nokkrar tegundir af antílópum. Honum tókst þó ekki að klófesta híenu þrátt fyrir að hafa legið í leyni í þrjár nætur, tilbúinn með byssuna.

Ljósmyndir frá veiðiferðinni verða sýndar á hinni árlegu byssusýningu Veiðisafnsins sem verður haldin í samvinnu við verslunina Vesturröst um helgina. „Þetta er orðið landsþekkt. Menn eru farnir að skrifa um þetta í almanakið hjá sér, fyrsta helgin í febrúar,“ segir Páll „Við verðum með mikið af haglabyssum, skambyssum og vélbyssum og ýmislegt fleira,“ segir hann og bætir við að í fyrra hafi nýtt aðsóknarmet verið sett á safnið þegar rúmlega 9.300 manns stigu þangað inn fæti. „Alveg frá árinu 2004 hefur verið mikil aukning milli ára. Þetta hefur verið virkilega gaman.“

Páll hefur gert endurbætur á safninu eftir jarðskálftann sem gekk yfir Suðurland 2008 og stækkað eldri sýningarsalinn. Hvetur hanna alla áhugamenn um byssur og veiðar til að láta sjá sig um helgina. Nánari upplýsingar um byssusýninguna má finna á síðunni veidisafnid.is. -fb