Þórður Friðjónsson: Burt með sérlausnir og pólitísk afsktipti

Þórður Friðjónsson forstjóri Kauphallarinnar segir að Íslendingar verði að hverfa sem fyrst af braut sérlausna og pólitískra afskipta eigi þjóðin að ná að skipa sér á bekk með bestu hagkerfum heims. Hann ritar grein í Fréttablaðið í dag þar sem hann bendir á stöðu Norðurlandanna sem öll teljist til bestu hagkerfa í heimi. Að mati Þórðar ber Ísland öll megin einkenni norræna efnahagslíkansins en að agaðan markaðsbúskap skorti.

Norðurlöndin byggja á tveimur stoðum að sögn Þórðar, velferðarkerfinu annars vegar og á vel skipulögðum markaðsbúskap hins vegar.

„Ísland virðist ekki komið eins langt í þessum efnum og umræddar frændþjóðir. Til marks um það eru mikil pólitísk afskipti sem tíðum leiða til sérlausna af ýmsu tagi - og jafnvel upptöku samninga sem gerðir hafa verið í góðri trú. Það er t.a.m ekki einleikið hversu mörg mál enda á borði ráðherra og festast þar í lengri eða skemmri tíma. Magma er nærtækt dæmi sem og Helguvíkurverkefnið. Þá er afskaplega óheppilegt hversu það hefur dregist að aflétta þeirri óvissu sem sjávarútvegurinn býr við vegna endurskoðunar kvótakerfisins," skrifar Þórður.

Þórður bendir einnig á að agaður markaðsbúskapur geti ekki grundvallast á sérlausnum sem ráðist af duttlungum ráðamanna á hverjum tíma. Hann byggist á skýrum og stöðugum leikreglum.

„Þessi sjónarmið hafa ekki verið í hávegum höfð hér á landi, samanber nýja úttekt OECD meðal 48 landa á takmörkunum á erlendri fjárfestingu. Aðeins Kína telst búa við meiri takmarkanir en Ísland. Hin Norðurlöndin eru hins vegar öll meðal þeirra landa sem búa við minnstar takmarkanir að þessu leyti og ekki kemur á óvart að Finnland, á toppi lista Newsweek, er opnast Norðurlanda fyrir erlendri fjárfestingu."

„Hverfa þarf sem fyrst af þessari braut sérlausna og pólitískra afskipta," skrifar Þórður. „Það er alveg ljóst að núverandi skipulag og vinnulag mun ekki færa okkur bætt lífskjör og stöðu meðal þeirra þjóða sem standa sig best á sviði efnahagsmála. Við þurfum því sem fyrst að virkja markaðinn með svipuðum hætti og hin Norðurlöndin hafa gert með góðum árangri og reka hér á landi öflugan markaðsbúskap eins og þar er gert. Bestu hagkerfi í heimi verða ekki byggð á sérlausnum heldur markaðslausnum."

Grein Þórðar má lesa í heild sinni hér.