Eldsneytisverð nánast eins á öllum stöðvum

Þrátt fyrir að eldsneytisverð á Íslandi hafi haldist stöðugt síðustu vikur og lítill verðmunur verið milli olíufyrirtækja segja forsvarsmenn fyrirtækjanna að hörð samkeppni ríki.

Munurinn á hæsta og lægsta verði á útsölustöðum í gær var einungis 1 króna og 60 aurar, að því er fram kom á vefnum GSMbensin.is. Orkan var með lægsta verðið, eða 192,3 krónur fyrir lítrann í sjálfsafgreiðslu, en hæsta verðið var hjá Shell, 193,90 krónur.

Runólfur Ólafsson, framkvæmdastjóri Félags íslenskra bifreiðaeigenda, segir í samtali við Fréttablaðið að undanfarið hafi fyrirtækin ekki stundað staðbundin verðstríð eins og áður. Nú sé meira eða minna sama verð um allt land. „Þessi viðleitni til samkeppni hefur nánast horfið. Þó að sumir hafi haldið því fram að þetta hafi verið látalæti hjá fyrirtækjunum er ég hálfsmeykur um að til lengri tíma sé núverandi ástand verra."

Hann óttast að þetta ástand gæti drepið niður þá verðvitund sem þó var orðin þar sem fólk fylgdist grannt með eldsneytisverði. „Við vorum að sjá verulegar verðsveiflur á höfuðborgarsvæðinu og ákveðinn hópur viðskiptavina var farinn að miða sín kaup miðað við hvar var ódýrast að fylla á bílinn og notaði til þess síðuna GSMbensin.is." Runólfur segir þó að álagning fyrirtækjanna hafi minnkað að undanförnu og það sé jákvætt fyrir neytendur.

Forsvarsmenn olíufyrirtækjanna segja að samkeppni á markaðnum sé afar virk. „Hún kemur í sveiflum eins og margt annað," segir Hugi Hreiðarsson, markaðsstjóri Atlantsolíu, í samtali við Fréttablaðið og bendir á að um 90 verðbreytingar hafi verið á markaðnum á fyrri hluta þessa árs og þær hafi sjaldan verið eins margar. „Það gat enginn haldið út þá álagningu sem komin var í því verðstríði og ég held að allir séu að jafna sig á því."

Samúel Guðmundsson, framkvæmdastjóri vörustýringarsviðs Olís, segir bullandi samkeppni í gangi. Verðið í sumar hafi verið óvenjulágt og sé lægra en í nágrannalöndunum. „Bensínverð hérna heima hefur verið stöðugt en farið hækkandi erlendis síðustu daga þannig að það er einfaldlega hækkunar þörf."

thorgils@frettabladid.is