Stálu golfbílum og fjórhjóli á Akureyri

Þrír menn um tvítugt hafa verið ákærðir fyrir Héraðsdómi Norðurlands eystra fyrir fjölmörg þjófnaðarbrot. Í sumum tilvikum voru tveir þeirra saman að verki en í öðrum allir þrír.

Mönnunum er gefið að sök að hafa brotist inn í vélaskemmu við Golfklúbb Akureyrar í nóvember á síðasta ári. Þar stálu þeir fatnaði sem á vegi þeirra varð, svo og 120 lítrum af bensíni. Þá tóku þeir tvo golfbíla traustataki og óku um svæðið þar til annar bílanna lenti ofan í skurði. Eftir þetta stálu þeir fjórhjóli sem fannst síðan í skurði frammi í Eyjafjarðarsveit.

Sláttutraktor stálu þeir við tjaldstæði í Kjarnaskógi, óku honum um svæðið og ýttu honum loks út í tjörn, þar sem hann fannst nokkrum dögum síðar. Dekkjum og felgum stálu þeir undan bíl í bænum.

Að minnsta kosti fimm sinnum brutust mennirnir inn í ísbíl á Akureyri og stálu vörum úr honum. Mennirnir stálu bensíni til einkanota í allmörg skipti, dýrum tækjum sem þeir fundu í innbrotunum svo og peningum.

Tíu ákærur í nítján liðum voru þingfestar á hendur mönnunum fyrir héraðsdómi.- jss