Glæpamenn stálu flatskjá af gamalmennum

Eldri borgarar á Álftanesi urðu fyrir því óláni að á þriðjudagsmorgun var brotist inn í félagsaðstöðu þeirra og flatskjá sem var í þeirra eigu stolið. Guðrún Jónsdóttir, formaður Félags eldri borgara á Álftanesi, segir að þetta sé tilfinnanlegt tjón fyrir þau. Sérstaklega í ljósi þess að staða sveitarfélagsins Álftaness sé það bágborin að engin tök séu á því að kaupa nýjan flatskjá.

Félagið er tryggt hjá TM en Guðrún er ekki bjartsýn á að fá tjónið bætt. Hún segir skaðann vera tilfinnanlegan enda margir sem nýti sér aðstöðuna. „Djáknin okkar ætlaði að vera með bíósýningar í vetur fyrir aldraða einu sinni í mánuði. Hvernig sýnir hún bíó núna. Þetta er fólk sem fer ekki í bíó og er ekki með Stöð 2, hefur einfaldlega ekki efni á því," segir Guðrún.

„Það er enginn garður sem er lægri. Þetta minnir mig á þegar það voru einhverjir vitleysingar sem réðust á hana Ásdísi Jennu og stálu af henni GSM síma í Kringlunni. Þetta er svona álíka stórmannlegt," segir Guðrún og vísar í frásagnir fjölmiðla fyrir fáeinum misserum af því þegar óprúttnir aðilar stálu síma af konu sem bundin er við hjólastjól.

Guðrún skorar á þann sem tók flatskjáinn að skila honum aftur til lögreglunnar eða til sín.