Safnar áfram tækjum fyrir sjúklinga

Samfélagsmál Heilbrigðisstofnun Suðurnesja (HSS) fékk góðar gjafir á dögunum, en Þorbjörg Elín Friðriksdóttir og fjölskylda afhentu stofnuninni ytri öndunarvél, vökvadælu, og tvo hjólastóla. Þessi tæki eru afrakstur söfnunar sem Þorbjörg hefur staðið fyrir, en hún er sjálf sjúklingur á HSS.

Veikindi Þorbjargar voru einmitt kveikjan að þessari söfnun að hennar sögn. „Ég kom eitt kvöldið og ætlaði að ganga beint að öndunarvélinni, en þá var annar sjúklingur að nota hana og þá þurfti að fá aðra vél innan úr Reykjavík. Ég nefndi þetta við móður mína daginn eftir og hún sagði að við skyldum bara safna fyrir nýrri vél.“

Þorbjörg skrifaði bréf til allra kvenfélaga og verkalýðsfélaga á Suðurnesjum, sem og bæjarfélaga, en hæsta framlagið kom frá Sjálfsbjörg, sem gaf 455.000 krónur. Alls söfnuðust 2,4 milljónir króna.

Þorbjörg lætur ekki staðar numið nú, því hún ætlar að halda áfram með söfnunina og hefur sett sér það takmark að safna fyrir sjónvarpstækjum á allar stofur á legudeild, alls fimmtán stofur. - þj