Líknandi meðferð deyjandi sjúklinga flutt frá Suðurnesjum

Hjúkrunarráð Heilbrigðisstofnunar Suðurnesja lýsir yfir verulegum áhyggjum vegna 25 prósenta niðurskurðar á fjárlögum 2011.

„Að óbreyttu hefur þetta í för með sér gífurlega skerðingu á þjónustu við íbúa svæðisins. Sýnt er að fæðingaþjónusta, þjónusta við hjarta og lungnasjúklinga, endurhæfing, þjónusta við langveika og krabbameinssjúklinga og líknandi meðferð deyjandi sjúklinga svo eitthvað sé nefnt mun flytjast til Reykjavíkur," segir í ályktun frá hjúkrunarráðinu.

Þar kemur einnig fram að HSS hefur á undanförnum árum þurft að búa við lægstu fjárframlög miðað við íbúafjölda samanborið við aðrar heilbrigðisstofnanir.

Í ályktun frá hjúkrunarráðinu, sem Bryndís Sævarsdóttir og Steina Þórey Ragnarsdóttir skrifa undir, segir að búast megi við að að 60-100 manns missi atvinnu þar sem mesta atvinnuleysið er fyrir á landinu.

Þær skora á ráðamenn þjóðarinnar að endurskoða niðurskurðinn á HSS og segja að Suðurnesjamenn muni áfram þurfa á þjónustu að halda og ljóst að ekki sé um sparnað að ræða með því að flytja þá til Reykjavíkur.