Þóknanir til BÍ án samninga

Bændasamtök Íslands (BÍ) hafa fengið þóknanir frá ríkinu fyrir umsýslu á niðurgreiðslum ríkisins til bænda þrátt fyrir að engir samningar hafi verið gerðir um greiðslurnar.

Ríkisendurskoðun átelur þetta, sem og verklag við búvörusamninga almennt, í nýrri skýrslu. Stofnunin segir áríðandi að ráðuneytið herði eftirlit með framkvæmd búvörusamninga, sem snúast meðal annars um greiðslur ríkisins til bænda.

Í tilkynningu frá ráðuneytinu segir að þegar sé búið að bæta úr hluta af því sem bent sé á í skýrslunni. Greiðslur til BÍ vegna umsýslu námu 10,7 milljónum króna í fyrra.

Í skýrslunni eru nefnd dæmi um hvernig tugir milljóna, allt að 150 milljónir, hafi verið rangt bókaðir. Til dæmis voru greiðslur til mjólkurbænda bókfærðar sem greiðslur til sauðfjárbænda, og greiðslur sem runnu til sauðfjárbænda bókfærðar til mjólkurbænda. Þessar rangfærslur leiddu til þess að rangfærslur voru í ríkisreikningi.

Í skýrslu Ríkisendurskoðunar segir að erfitt sé fyrir aðra en sérfróða að átta sig á því hvernig greiðslur vegna búvörusamninga séu samsettar. Ráðuneytið verði að tryggja aukið gagnsæi þannig að þingmenn, eftirlitsaðilar og almenningur geti áttað sig á þeim. - bj