Missti allt sitt á einum degi

Hundurinn Spotti, sem dvalið hefur á fósturheimili Dýrahjálpar frá því í ágúst, missti allt sem hann átti á einum degi. Tík sem var á heimili með honum, ári eldri en hann og besti félagi fékk krabbamein þegar flytja átti þau tvö á fósturheimilið. Það varð því að svæfa hana og sama dag varð Spotti að sjá á bak eiganda sínum frá upphafi og heimili sínu, því eigandinn þurfti að flytja til foreldra sinna, þar sem ekki var hægt að hafa hunda.

Í dag er hann svo árásargjarn við aðra hunda, að til vandræða horfir. Verið er að vinna í því í samstarfi við hundaþjálfara og dýraatferlisfræðing.

Spotti hefur frá því í ágúst fengið tvær fjölskyldur sem tóku hann að sér en það gekk ekki upp af ýmsum ástæðum og fór hann því á fósturheimilið aftur.

„Hann er yndislegur á heimili, skapgóður, rólegur, skemmtilegur og hlýðinn,“ segir Guðrún Jónsdóttir, fóstra Spotta. „Hann hefur alla eiginleika góðs heimilishunds nema þennan galla.“

Nú er verið að gera lokatilraun til að finna heimili fyrir Spotta.