Borgin styrkir atvinnuskapandi verkefni ungs fólks

Borgarráð samþykkti á fundi sínum í gær að veita tæplega 10 milljónir króna til atvinnuskapandi verkefna ungs fólks. Alls hlutu tíu verkefni styrki.

Hanna Birna Kristjánsdóttir, fráfarandi borgarstjóri, segir verkefnin vera fjölbreytt en eiga það sammerkt að veita ungu fólki tækifæri til að skapa eigin atvinnutækifæri. Hún segir að þau komi jafnframt til með að lífga upp á borgarumhverfið.

Í tilkynningu frá Reykjavíkurborg kemur fram að verkefnin eru af ýmsum toga og má þar nefna knattspyrnukennslu í almenningsgörðum, íþróttaæfingar fyrir börn með sérþarfir, listamiðstöð sem mun ferðast um miðborg Reykjavíkur og vinnusmiðjur fyrir atvinnulaust ungt fólk á sviði arkitektúrs og borgarskipulags.

Borgarráð samþykkti fyrr í vetur að setja 150 milljónir í sérstök atvinnuátaksverkefni, þar af 30 milljónir í sjóð fyrir ungt fólk til að skapa sín eigin atvinnutækifæri. Þetta er í annað sinn á árinu sem úthlutunarnefnd fyrir verkefni í þágu ungs fólks úthlutar styrkjum. Auglýst var eftir styrkumsóknum undir merkjunum „Vertu með" og umsóknarfrestur var til 15. maí. Næst verður auglýst eftir umsóknum um styrki í ágúst.

Styrkirnir eru fyrir ungt fólk 35 ára og yngri. Markmiðið er að hvetja ungt fólk til atvinnusköpunar og stuðla að auknum lífsgæðum borgarbúa. Við úthlutun fjármagns var tekið mið af því að verkefnin leiddu af sér sem flest ný störf, auðguðu borgarlífið, stuðluðu að nýsköpun í þjónustu og hvöttu ungt fólk áfram til dáða.