Mótmæltu í Eyjum

Fjölmargir Vestmannaeyingar komu saman á útifundi á Stakkagerðistúni seinnipartinn í dag. Þar var niðurskurður í heilbrigðiskerfinu ræddur. Samkvæmt fjárlagafrumvarpi fyrir næsta ár munu Vestmannaeyingar verða fyrir barðinu á niðurskurði, eins og svo mörg önnur sveitarfélög.

Á fundinum var aðgerðarleysi ríkisstjórnar og tillögum um niðurskurð á framlögum ríkisins til rekstrar Heilbrigiðsstofnunar Vestmannaeyja árið 2011 mótmælt.

Samkvæmt fjárlagafrumvarpinu á að skera niður um tæp 24% til Heilbrigðisstofnunar Vestmannaeyja, sem þýðir að mati framkvæmdastjóra stofnunarinnar að loka þurfi skurðstofu, hætta fæðingarþjónustu, fækka sjúkrarúmum og segja upp allt að 30 starfsmönnum.

Bæjarstjórinn Elliði Vignisson sagði Eyjamenn standa frammi fyrir ógn. „Þetta er ekki ógn eins og við erum vön.  Þetta er ekki hættan á aflabresti. Þetta er ekki hættan á því að válynd veður grandi fiskibátum okkar. Þetta er ekki hættan á því að eldgos eyði hér byggð. Nei! Þetta er hættan á því að ríkisvaldið leggi hér niður þá heilbrigðisþjónustu sem við þurfum. Þetta er hættan á því að borgarmiðuð stjórnvöld skapi hér bráða hættu. Þetta er hættan á því að sú kreppa sem búin var til á höfuðborgarsvæðinu verði greidd af okkur sem ekki tókum þátt í gengdarlausum dansi um gullkálfinn,“ sagði Elliði í ræðu sinni.