Ásdís Rán tapaði tryggingamálinu

Glysbomban Ásdís Rán Gunnarsdóttir tapaði dómsmáli gegn tryggingafélaginu Verði sem hún höfðaði vegna ágreinings um að bifreið, sem hún ók þegar hún lenti í bílslysi 2007, hefði verið tryggð þegar slysið varð.

Lagaleg rök Ásdísar eru þau að hún ásamt manni sínum, Garðari Gunnlaugssyni, hefðu verið flutt til Svíþjóðar, þar sem hann stundaði atvinnumennsku í fótbolta, þegar iðgjöldin féllu. Tryggingafélagið hefði sent ítrekun um vanskil á tryggingagjaldinu á lögheimili þeirra á Íslandi en maður, sem tengist þeim ekki, tók við póstinum.

Telur hún það ófullnægjandi af hálfu vátryggingafélagsins, og beri jafnframt vott um óvönduð vinnubrögð þess, að senda tilkynningu um niðurfellingu tryggingarinnar á lögheimili vátryggingartaka, án þess að frekar sé gengið eftir því að hann kynni sér efni tilkynningarinnar.

Sjálf báru Ásdís og Garðar vitni símleiðis í málinu en þau eru búsett í Búlgaríu eins og frægt er orðið.

Héraðsdómur Reykjavíkur féllst ekki á þessi rök. Þar kom fram að iðgjöldin hefðu ekki verið greidd þegar slysið átti sér stað. Því var Vörður sýknaður.