Fræða almenning um geðheilbrigði barna

Barna- og unglingageðdeild Landspítalans hefur gefið út tvo fræðslubæklinga um geðheilbrigði barna í samstarfi við Landlæknisembættið og Lýðheilsustöð. Annar bæklingurinn er ætlaður unglingum og hinn aðstandendum barna og unglinga.

Samkvæmt upplýsingum frá Landlæknisembættinu var ákveðið að ráðast í gerð fræðslubæklinganna í ljósi þess að ekkert efni var til á íslensku um þetta efni þrátt fyrir brýna þörf.

Salbjörg Bjarnadóttir, verkefnastjóri hjá Landlækni, segir að í bæklingunum fyrir foreldrana séu reifuð ýmis vandamál sem geti komið upp hjá börnum og ungmennum og rætt hvernig hægt sé að bregðast við þannig að vandamál ágerist ekki. Í bæklingnum fyrir unglingana sé rætt um mikilvægi geðheilsu unglingsins og að maður eigi að vera vakandi fyrir sjálfum sér og vinum sínum. Fjallað sé um einelti og fleira.

Bæklingana má finna á vef Landlæknis með því að smella hérna.