Boltinn er núna hjá Expressferðum

Hildigunnur Hafsteinsdóttir, lögfræðingur Neytendasamtakanna, segir samtökin nú bíða viðbragða Expressferða við þeirri niðurstöðu Neytendastofu að ferðaskrifstofan hafi átt að endurgreiða að fullu pakkaferð til Berlínar.

Ferðin, sem fara átti 16. apríl í vor, var felld niður þar sem flugvöllurinn í Berlín var lokaður vegna eldgoss í Eyjafjallajökli. Expressferðir gáfu farþegunum kost á nýrri ferð gegn 25 þúsund króna viðbótarframlagi eða að fá endurgreiddan þann helming kostnaðarins, um 40 þúsund krónur, sem var vegna flugsins sjálfs. Hótelgistingin var hins vegar ekki endurgreidd. Sjö farþeganna leituðu til Neytendasamtakanna sem kærðu ákvörðun Expressferða fyrir hönd eins þeirra.

Hildigunnur bendir á að Neytendastofa úrskurði ekki um fjárhagslegar kröfur einstaklinga og geti því ekki lagt fyrir Expressferðir að endurgreiða alla ferðina heldur geti aðeins sagt til um hvað ferðaskrifstofan hafi átt að gera.

„Þó að þessi úrskurður sé kominn er ekki víst að þessi aðili eða aðrir í sömu sporum fái peningana sína. Nú erum við í raun að bíða eftir því hvort Expressferðir ætli að bregðast við með því að endurgreiða þeim sem leitað hafa til okkar eða áfrýja,“ segir Hildigunnur.

Lilja Hilmarsdóttir, rekstrarstjóri Expressferða, segir lögmenn ferðaskrifstofunnar enn fara yfir stöðuna. „Málið er enn þá í skoðun,“ segir Lilja. - gar