Jóhanna nýtur lögregluverndar en Steingrímur ekki

Lögreglumaður á vegum Ríkislögreglustjórans fylgir Jóhönnu Sigurðardóttur forsætisráðherra hvert fótmál og hefur gert síðan mótmælin hófust við setningu Alþingis samkvæmt heimildum Vísis.

Það er Ríkislögreglustjóri sem annast öryggisgæslu ráðamanna þjóðarinnar og metur hvort þörf sé á því að vernda þá. Samkvæmt frétt sem birtist á heimasíðu DV þá kemur fram að lögreglumaðurinn sé sérsveitamaður.

Litlar upplýsingar var um málið að hafa aðrar en þær að Jóhanna nýtur verndar eftir að mótmælin hófust.

Steingrímur J. Sigfússon fjármálaráðherra nýtur ekki samskonar verndar og Jóhanna samkvæmt upplýsingum úr fjármálaráðuneytinu.