Nýr formaður UJ segir ótækt að skera niður fæðingarorlof

Guðrún Jóna Jónsdóttir var kjörin formaður samtaka Ungra jafnaðarmanna, á landsþingi sem haldið var nú um helgina. Í ræðu á þinginu sagðist hún krefjast þess að fyrirhugaður niðurskurður á fæðingarorlofi verði ekki að veruleika. Hún segir Fæðingarorlofssjóð ekki lúxusstofnun heldur grunnþjónustu. Ótækt sé að sú þjónusta verði enn og aftur fyrir niðurskurðarhnífnum.

Guðrún Jóna situr einnig í framkvæmdastjórn Samfylkingarinnar, jafnréttisráði Kópavogs og í stýrihóp um orkustefnu Íslands fyrir Iðnaðarráðuneytið. Guðrún Jóna er tölvunarfræðingur og starfar hjá MarOrku.