Viltu kaupa flottasta símanúmer í heimi?

Símafyrirtækið Nova fór um helgina af stað með uppboð á símanúmerinu 777 7777, sem stjórnendur fyrirtækisins telja að sé flottasta símanúmer í heimi. Lágmarksboð í númerið var 10 þúsund krónur en hæsta boð stendur nú í 112 þúsund krónum.

Liv Bergþórsdóttir, framkvæmdastjóri Nova, segir að hugmyndin að uppboðinu hafi kviknað þegar að ákveðið var að fara af stað með nýja númeraseríu. Margir hafi haft samband og sagst vera reiðubúnir til að greiða hátt verð fyrir flott númer. „Svo við bara ákváðum að láta reyna á það með þessum hætti og styrkja gott málefni í leiðinni," segir Liv, en peningurinn sem fæst fyrir númerið mun renna til Fjölskylduhjálpar Íslands. Liv segist alveg hafa átt von á því að hæsta boð færi yfir 100 þúsund krónur.

Liv segir að þegar fólk skipti um farsímafyrirtæki taki það yfirleitt gamla símanúmerið sitt með sér. Fólk sé íhaldssamt á sitt fyrsta farsímanúmer.

Hægt verður að bjóða í númerið 777-7777 fram á föstudag.