Yndislegt að gera öðrum gott

„Það er bara yndisleg tilfinning, ef maður getur gert einhverjum gott," segir stórsöngvarinn Jóhann Friðgeir Valdimarsson.

Lionsklúbburinn Fjörgyn í Grafarvogi stendur fyrir árlegum tónleikum til styrktar Barna- og unglingageðdeild Landspítalans fimmtudaginn 11. nóvember. Margir af helstu listamönnum þjóðarinnar koma fram á tónleikunum og Jóhann Friðgeir er einn þeirra.

„Þetta eru hátiðartónleikar þannig lagað," segir Jóhann Friðgeir, sem segir þó ekki um jólatónleika að ræða. Jóhann Friðgeir segist gera ráð fyrir að hann muni syngja stórar aríur sem hafi notið mikilla vinsælda. Þetta er áttunda árið í röð sem Lionsklúbburinn Fjörgyn í Grafarvogi stendur fyrir tónleikum sem þessum og aðsóknin hefur alltaf verið mikil. Jóhann Friðgeir segist hafa verið með í öll skiptin nema tvisvar.

Það er annars í nógu að snúast hjá Jóhanni Friðgeiri þessa dagana. Hann er um þessar mundir að syngja í Rigoletto í Íslensku óperunni. Eftir það tekur jólamánuðurinn við. Jóhann Friðgeir segir að hann muni syngja á þrjátíu tónleikum með Frostrósum auk fleiri tónleika.