AGS leggur til hátekjuskatt

Alþjóðagjaldeyrissjóðurinn leggur til í nýrri skýrslu að hátekjuskattur verði lagður á millitekjufólk til auka tekjur ríkissjóðs. Skattþrepin verði tvö í staðinn fyrir þrjú.

Alþjóðagjaldeyrissjóðurinn skilaði frá sér skýrslu í síðasta mánuði um endurbætur á íslenska skattkerfinu. Þar eru lagðar til fjölmargar breytingar sem flestar miða að því að einfalda kerfið.

Lagt er til að dregið verði úr undanþágum í virðisaukaskattkerfinu og að fjármagnstekjuskattur verði hækkaður úr 18 prósentum í 20. Sjóðurinn leggur ennfremur til að eldsneytisskattar verði hækkaðir sem og orku- og auðlindaskattar.

Ríkisstjórnin fór í umfangsmiklar skattbreytingar um síðustu áramót. Tekjuskatti var þannig skipt upp í þrjú þrep þar sem rúmlega 46 prósenta hátekjuskattur var lagður á tekjur yfir 650 þúsund krónum á mánuði.

Alþjóðagjaldeyrissjóðurinn vill einfalda kerfið og leggja niður milliþrepið og færa þannig millitekjufólk upp í efsta skattþrepið.

Þannig er lagt er til að rúmlega 47 prósenta skattur verði lagður á tekjur yfir 375 þúsund krónum á mánuði. Þessi breyting á að auka skatttekjur um fjóra milljarða á ári.

Önnur leið sem sjóðurinn leggur til er að halda þrepakerfinu þrískiptu en draga úr stighækkun skatta.

Vilhjálmur Egilsson, framkvæmdastjóri Samtaka atvinnulífsins, líst vel á að skattkerfið verði einfaldað en telur að svigrúm til skattahækkana sé lítið sem ekkert. Hækkun á tekjuskatti millitekjufólks muni aðeins skila sér í minni neyslu.

„Líka það að það er svo marg tða þessu fólki sem er að berjast við að standa í skilum þrátt fyrir að tekjurnar hafi lækkað. ég hef þess vegna neina trú á því að það sé lausn á efnahagsvandanum að færa hátekjuþrepið niður eins og sjóðurinn leggur til," segir hann.