Kalla eftir einingu á meðal ráðamanna

„Reyknesingar hafa fengið sig fullsadda af óeiningu ráðamanna, atvinnuleysi, gjaldþrotum, nauðungarsölum, endalausum töfum og aðgerðarleysi. Nú þarf að hafa skýra sýn og taka á málum með festu," segir í ályktun borgarafundar sem haldinn var í Stapa í Reykjanesbæ í kvöld.

Fundurinn var haldinn í samvinnu við Samtök atvinnurekenda á Reykjanesi. Hann var þétt setinn, að því er fram kemur á vef Víkurfrétta. Starfsmenn Heilbrigðisstofnunar Suðurnesja kveiktu á blysum til að vekja athygli á málstað sínum en niðurskurður á fjárlögum næsta árs mun hitta stofnunina illa fyrir.

Reyknesingar telja nauðsynlegt að greiða leið ákveðinna atvinnusköpunarverkefna í stjórnkerfinu svo Reyknesingar og landsmenn allir fái notið þrotlausrar atvinnuuppbyggingar síðustu ára. Það sé lágmarkskrafa að stjórnvöld og hagsmunaaðilar styðji við þá gríðarlegu vinnu sem lögð hefur verið í uppbyggingu atvinnuverkefna á svæðinu. Allir verði að leggjast á eitt við að koma hjólum atvinnulífsins af stað.