Vill ekki kosningar - Ný stjórn sami grautur með öðrum formerkjum

„Við erum ekki hætt," segir Ásta Hafberg, ein af þeim sem stóðu að mótmælunum á mánudagskvöldinu en hún segist ekki búast við því að mótmæli verði haldin á þeirra vegum í kvöld.

Hún segir mótmælin hafa tekið talsverðan toll af kröftum þeirra sem að þeim stóðu og nú sé komið að því að endurnýja krafta sína og endurskipuleggja.

„Við hættum ekki fyrr en heimilin fá betri lausnir," segir Ásta sem hefur fundið fyrir gríðarlegum meðbyr í mótmælunum sem hafa mælst vel fyrir á meðal almennings.

Aðspurð hvernig henni líki viðbrögð stjórnmálamanna eftir mótmælin svarar hún því til að Alþingi virðist ekki vera í neinum tengslum við samfélagið lengur, það vanti alla yfirsýn.

„Ég vil ekki kosningar núna. Ný stjórn yrði bara sami grauturinn með öðrum formerkjum," segir Ásta sem vill einhverskonar neyðarstjórn eða starfsstjórn. Hún vill gefa núverandi þingmönnum frí.

„Við erum bara komin á þann stað að við þurfum faglega starfsstjórn," segir Ásta sem er ánægð með þá viðleitni sem stjórnmálamenn hafa sýnt eftir mótmælin, þó sú viðleitni sé of lítil að hennar mati.

Hún segir mikilvægast nú að halda dampi. Mótmælendur verða að halda áfram þar til kröfum þeirra verður svarað að sögn Ástu.