Karlmenn á háum hælum ganga gegn ofbeldi

Tveir karlmenn hafa tekið sig saman og ætla að ganga á háum hælum til að vekja athygli á ofbeldi gegn konum. Þeir eru bjartsýnir á að góður hópur karlmanna verði með þeim og þegar hefur ein kona sem notar stóra skó boðist til að lána þá til karlanna.

Svavar Knútur Kristinsson tónlistarmaður er annar skipuleggjenda viðburðarins. „Ég væri alveg til í að rölta aðeins um á háum hælum og sjá hvernig það gengur," segir hann. Svavar tekur fram að hann hafi aldrei skilið af hverju konur ganga í háhæluðum skóm. „Aldrei hef ég ætlast til þess og finnst bara fallegt að sjá konur á strigaskóm eða bara í gúmmístígvélum þess vegna," segir hann og líkir háum hælum helst við morðtól.

Skipulagning viðburðarins er alveg á byrjunarstigi en hugmyndin kom fyrst fram á póstlista femínista. Þar var sagt frá því að í Toronto í Kanada hafi karlmenn tekið sig saman og staðið fyrir hópgöngu á háum hælum. Viðburðurinn kallaðist „Walk a mile in her shoes" og gengu þeir eina mílu á hælum, með góðum árangri. Nú ætla íslenskir kynbræðir þeirra að gera slíkt hið sama.

Kolbeinn Stefánsson félagsfræðingur ætlar að skipuleggja gönguna með Svavari Knúti. Á póstlistanum lýstu þeir sig báðir reiðubúna il að setja sig í spor kvenna í bókstaflegri merkingu. „Ég er viss um að við getum fengið fjölda karlmanna til liðs við okkur," segir hann.

Ein stærsti höfuðverkurinn við að koma hugmyndinn í framkvæmd er skortur á háhæluðum skóm í stórum stærðum.

Björk Vilhelmsdóttir borgarfulltrúi hefur þó stigið fram og býðst til að lána sína skó. Hún segist eiga nokkuð af kvenskóm í stærð 44 og jafnvel stærð 45, en fæstir með mjög háum hælum.

Karlmennirnir vonast til að fleiri konur sem nota stóra skó bjóði þá fram. Dagsetning viðburðarins er enn óákveðin. Þeir Kolbeinn og Svavar verða báðir erlendis þegar baráttuhátíð vegna kvennafrídagsins verður haldin í Reykjavík dagana 24. og 25. október, og því ljóst að viðburðurinn verður annað hvort fyrir eða eftir þann tíma.

Myndband frá göngunni „Walk á mile in her shoes" sem haldin var í Kanada á síðasta ári má sjá með því að smella hér.