Grunaður um að lemja konu og hrinda fötluðum manni

Hæstiréttur Íslands staðfesti í dag gæsluvarðhald yfir manni sem er grunaður um að hafa lamið fyrrverandi kærustu sína með hnúajárni og stórslasað hana. Maðurinn skal sæta gæsluvarðhaldi til 1. nóvember.

Maðurinn ruddist inn á heimili konunnar í Hveragerði og lamdi hana í höfuðið. Í lýsingum af árásinni segir að mikið blóð hafi verið í íbúð konunnar. Þá er sérstaklega tekið fram að það hafi verið hending að maðurinn varð konunni ekki að bana.

Samkvæmt úrskurði Héraðsdóms Suðurlands þá er maðurinn einnig grunaður um að hafa hrint fötluðum manni af reiðhjóli og ráðist á hann með þeim afleiðingum að maðurinn mjaðmagrindabrotnaði.

Þá hefur dómsmál á hendur honum verið þingfest en hann er ákærður fyrir að aka án ökuréttinda og undir áhrifum fíkniefna.