Ísland í forgrunni í Frankfurt - ekkert skorið niður

Katrín Jakobsdóttir menntamálaráðherra var viðstödd blaðamannafund sem haldinn var í Frankfurt í morgun þar sem helstu viðburðir tengdir Íslandi á Bókasýningunni í Frankfurt á næsta ári, en þar skipar Ísland heiðurssess.

„Íslendingar fagna því að Bókasýningin í Frankfurt hafi boðið okkur að vera heiðursgestir árið 2011" sagði Katrín á fundinum sem verkefnið Sagenhaftes Island hélt á sýningunni í morgun.

Þar voru kynntir helstu bókmennta- og listviðburðir sem fram fara á næsta ári í tengslum við heiðurssess Íslands á sýningunni. Katrín sagði verkefnið afar mikilvægt fyrir íslenska menningu og menningarkynningu og benti á að fjárframlög til þess hefðu ekki verið skorin niður á íslensku fjárlögunum, að því er fram kemur í tilkynningu.

„Hápunktur framlags Íslands á Bókasýningunni verður kynning á nýrri heildarþýðingu Íslendingasagnanna á þýsku. Verkin verða gefin út af forlaginu S.Fischer með stuðningi Menningarstofnunarinnar í Nordrhein-Westfalen. Þessi nýja útgáfa mun að nýju veita stórum lesendahópi aðgang að þessum einstæðu menningarsögulegu verkum," segir ennfremur.

Þá sagði Katrín að íslenskar bókmenntir stæðu í blóma nú um stundir og sérstaklega glæpasögur. Erlendis væri notað hugtakið Íslandskrimmi um glæpasögurnar. Þá kom einnig fram á fundinum að samið hafi verið um útgáfu á hátt í hundrað íslenskum bókum í Þýskalandi næsta árið.

Juergen Boos framkvæmdastjóri Bókasýningarinnar talaði einnig á fundinum og sagði hann að þrátt fyrir að Ísland væri á meðal minnstu markaðssvæða heimsins væri samt „ótrúlega mikið gefð út," en Boos er sagður afar áhugasamur um íslenskar bókmenntir og listir.

Halldór Guðmundsson, verkefnisstjóri Sagenhaftes Island, sagði frá yfirstandandi verkefnum og viðburðum næsta árs. Sögueyjan Ísland mun kynna íslenskar bókmenntir með upplestrum og öðrum kynningum á bókmenntahátíðum, í samstarfi við bókasögn, forlög og verslanir um allt Þýskaland á næsta ári.