Össur við bændur: Enginn er barinn til ásta

Össur Skarphéðinsson utanríkisráðherra hvetur íslenska bændur til að taka þátt í aðildarviðræðum vegna mögulegrar aðildar Íslands að Evrópusambandi og telur að bændur vanmeti samningsstöðu sína.

„Staðreyndin er einfaldlega sú, að samningsstaða íslensks landbúnaðar er betri en þeir telja, sem ekki vilja láta á hana reyna," segir Össur í bréfi til Bændasamtakanna. Að hans mati verða fulltrúar bænda að hafa sjálfstraust til að taka þátt í samningaviðræðunum af fullum þrótti til að tryggja hag þeirra sem best.

„Hvort sem okkur líkar betur eða ver, þá lifa bæði ég og forysta Bændasamtakanna í veruleika, þar sem enginn tryggir eftirá," segir Össur.

Bændasamtökin skrifuðu utanríkisráðherra bréf þann 22. september þar sem óskað er eftir að staða landbúnaðar í samningaferli Íslands við ESB verði skýrð. Í því bréfi vitna Bændasamtökin í orð Jóns Bjarnassonar sjávarútvegs- og landbúnaðarráðherra sem hefur sagt að umsóknarferlið sé þegar hafið. Össur hefur nú svarað bréfinu

Hann bendir á að enginn þekki íslenskan landbúnað jafn vel og íslenskir bændur og því sé nauðsylegt að þeirra þekkingar njóti við í aðildarviðræðunum. „Enginn er barinn til ásta, og ekki geng ég þess dulinn að leiðir kunna að skilja varðandi afstöðu til samnings að lokum. Á meðan hann er í smíðum þurfum við hins vegar að hafa kjark og innri styrk til að geta unnið saman að því að samningurinn verði sem bestur," segir hann.

Össur bendir á fimm atriði sem honum finnst mikilvægt að bændur hafi í huga þegar litið er til aðildarviðræðna. Þar beri fyrst að nefna kröfuna um fæðuöryggi en innan Evrópusambandsins sé fæðuöryggi orðið forgangsatriði þegar kemur að landbúnaðarstefnu sambandsins. Í öðru lagi sé ljóst að íslenskur landbúnaður búi að sérstöku erfðamengi vegna einangrunar bústofna. Þá bendir hann á að reglur Evrópusambandsins taki sérstakt tillit til landbúnaðar sem einkennist af fábreytni í framleiðslu, líkt og sá íslenski. Fjórða atriðið er að framleiðslustuðningur sé viðurkennd leið innan sambandsins til að viðhalda smáum búum á harðbýlum svæðum. Þar að auki segir Össur að bændur megi ekki horfa framhjá þeim möguleikum sem aðild gætu skapað þeim vegna sérstöðu sinnar.

„Íslenskir bændur framleiða frábærar afurðir, sem batna með ári hverju. Íslendingar munu alltaf halda tryggð við þær - einsog dæmið af grænmetinu sýnir. En aðild gæti jafnframt skapað íslenskum bændum nýja og sterka möguleika á hágæðamörkuðum Evrópu," segir Össur.

Bréf Össurs til Bændasamtakanna má lesa í heild sinni á vef utanríkisráðuneytisins.