Einn handtekinn á Selfossi vegna slagsmála - skaðaði lögreglumann

Mikið var að gera í umdæmi lögreglunnar á Selfossi í nótt og nú undir morgun. Um klukkan þrjú leytið í nótt dettur maður í heita pott í sumarbústað og fær skurð á hausinn. Hann leitar læknis en er ekki alvarlega slasaður, að sögn varðstjóra.

Töluvert mikið um vandamál hjá dyravörðum á skemmtistöðum bæjarins. Enginn alvarlega mál en lögregla þurfti að aðstoða dyraverði vegna drykkjuláta. Einn var tekinn grunaður um ölvun við akstur um fimm leytið.

Þá varð umferðaóhapp við Flúðir í morgun. Þrír voru í bílnum og sluppu þeir allir ótrúlega vel, að sögn varðstjóra.

Nú um sex leytið þurfti lögregla að hafa afskipti af slagsmálum við skemmtistaðinn Hvíta húsið. Einn var handtekinn vegna þeirra en hann skaðaði lögreglumann lítillega. Hann gistir nú fangageymslur og verður yfirheyrður þegar hann vaknar úr áfengisvímunni.