Birgitta: Ísland ekki risastór miðstöð fyrir klám

Allsherjarnefnd leggur til að þingsályktunartillaga um að Ísland skapi sér afgerandi sérstöðu um vernd tjáningar- og upplýsingafrelsis verði samþykkt með smávægilegum breytingum. Flutningsmaður tillögunar segir standa til að flytja erindi um hana á Evrópuþinginu síðar í mánuðinum.

Tillöguna styðja þingmenn allra flokka, en fyrsti flutningsmaður hennar er Birgitta Jónsdóttir, þingmaður Hreyfingarinnar. Megininntak tillögunnar er að styrkja tjáningarfrelsi, málfrelsi, upplýsingamiðlun og útgáfufrelsi auk þess sem vernd heimildarmanna og afhjúpenda verði tryggð.

Í nefndaráliti allsherjarnefndar sem lagt var fram í gær er lagt til að tillagan verði samþykkt, en Birgitta býst við að hún verði tekin til meðferðar fyrir þinglok. Hún segir stuðninginn í raun ekki hafa komið sér á óvart. Allsherjarnefnd segir þó ekki ætlunina að skapa aflandseyjastöðu á Íslandi þar sem alþjóðalög eru sniðgengin.

„Í raun og veru erum við ekki að leggja til að breyta lögum þannig að eitthvað verði löglegt sem þegar er ólöglegt," segir Birgitta. „Við erum ekki að fara að vera risastór miðstöð fyrir klám eða eitthvað þvíumlíkt, heldur miklu frekar að tryggja það að þeir sem þurfa að koma upplýsingum á framfæri, til dæmis í tengslum við þessi risafyrirtæki sem ráða öllu hér í heiminum, eða spilltum pólitíkusum, geti birt fréttir um það án þess að eiga á hættu að þær verði stoppaðar."

Birgitta segir erlenda fjölmiðla hafa sýnt tillögunni mikinn áhuga, og þeir hafi jafnvel sýnt því áhuga að flytja starfsemi sem tengist rannsóknarblaðamennsku til landsins verði hún að veruleika.

„Segjum að það sé einhver sem leggur sig í lífshættu í Sri Lanka eða Kína að blogga um hvernig ástandið er þar. Við getum ekki bjargað manneskjunni frá lögsókn, en við getum tryggt að efnið fái að vera áfram," segir Birgitta.