Gunnar Eyjólfs og Ómar Ragnars rúlluðu síðasta spölinn

Starfsfólk Reykjadals gekk í rúman hálfan sólarhring með þjóðþekkt fólk í hjólastólum til þess að safna áheitum fyrir sumarbúðirnar og nú hefur markmiðum söfnunarinnar verið náð, en rúmlega 15 milljónir króna hafa safnast.

Starfsmenn Reykjadals, sumarbúða Styrktarfélags lamaðra og fatlaðra, efndu til mikillar göngu sem hófst í gærmorgun kl. átta hjá sumarbúðunum í Reykjadal og endaði í dag um tvöleytið í höfuðstöðvum Styrktarfélagsins að Háaleitisbraut 13. Alls var því gengið í rúmlega þrjátíu klukkustundir um 130 kílómetra leið, en starfsmenn gengu með þjóðþekkta farþega í hjólastólum alla leiðina, eins og Eddu Björg Eyjólfsdóttur leikkonu og skemmtikraftana Haffa Haff og Steinda Jr. o.fl.

„Við erum alveg afskaplega þakklát fyrir þessar frábæru móttökur sem við höfum fengið. Eftir því sem ég best veit, eftir að hafa verið í göngu í einn og hálfan sólarhring, þá eru komnar fimmtán milljónir og rúmlega það. Þannig að við erum búin að tryggja að Reykjadalur verður opinn í vetur," segir Sólveg Hlín Sigurðardóttir, forstöðumaður Reykjadals.

Meðal þeirra sem sátu í stólunum síðasta spölinn voru Ómar Ragnarsson sjónvarpsmaður og skemmtikraftur og Gunnar Eyjólfsson leikari. „Það var tími til kominn að menn á mínum aldri skilji hvað sumt fólk á erfitt í lífinu, maður tekur því sem sjálfsögðum hlut að geta gengið og hlaupið," segir Gunnar. Ómar Ragnarsson segir að Reykjadalur hafi nýst aðstandendum beggja, því sonur Ómars og dótturdóttir Gunnars hafa dvalið þar. „Svo til viðbótar þá er þetta sérstök ánægja fyrir okkur tvo að vera hérna, því það er hrein tilviljun að veturinn 1959 hófum við báðir feril okkar sem skemmtikraftar," segir Ómar og Gunnar bætir við: „Það stendur enginn einn sem á Ómar að."

Sjá viðtal við þá félaga og Sólveigu Hlín í myndskeiðinu með fréttinni.