Á sjöttu milljón safnað fyrir börnin í Reykjadal

„Söfnunin gengur stórvel og nú hafa um 5,6 milljónir safnast. Við eigum von á stórum gjöfum á morgun og á þriðjudaginn þegar gangan hefst," segir Sólveig Hlín Sigurðardóttir forstöðumaður Reykjadals.

Í rúm 40 ár hefa verið starfræktar sumarbúðir og vetrardvöl í Reykjadal á vegum Styrktarfélag lamaðra og fatlaðra fyrir fötluð börn og ungmenni. Vegna samdráttar blasir nú við að hætta þurfi starfinu í Reykjadal en um 15 milljónir þarf til að tryggja starfsemina áfram sem hingað til hefur verið fjármögnuð með fjármagni frá ráðuneytum og sveitarfélögum.

Nýverið hófu starfsmenn og velunnarar Reykjadals fjársöfnun þar sem áheitum er safnað. Næstkomandi þriðjudag munu starfsmenn ganga með einhvern sitjandi í hjólastól frá Laugalandi í Holtum, sem eru einnig sumarbúðir fyrir fatlaða, til Reykjadals og þaðan að húsnæði Styrktarfélagsins að Háaleitisbraut í Reykjavík. Vegalengdin er um 130 kílómetrar.

„Boltinn hefur rúllað ansi hratt," segir Sólveig. Ljóst sé að margir velviljaðir í þjóðfélaginu vilji leggja þessu málefni lið. „Þetta skal takast."

Sólveig segir að forsvarsmenn Reykjadals og söfnunarinnar eigi von á góðum gjöfum þegar gangan hefst og á morgun en þá fer fram lokaball sumarbúðanna.

Söfnunarsíðu átaksins - Lengi lifi Reykjadalur - er hægt að skoða hér. Hægt er að styrkja sumarbúðirnar með því að leggja inn á reikning 549-26-10 og kennitalan er 630269-0249. Þá hefur verið opnaður söfnunarsími.

904-1010 Þegar hringt er í númerið bætast 1000 krónur við næsta símreikning.

904-1030 Þegar hringt er í númerið bætast 3000 krónur við næsta símreikning.

904-1050 Þegar hringt er í númerið bætast 5000 krónur við næsta símreikning.